الشروط د الاستعمال
هاد الشروط کاتنظّم الاستعمال ديال دارجة سوتيتراج، الأداة اللي کاتصايب سوتيتراج بالدارجة للڤيديوات و الأوديوات و اللّي کايقدّمها معهد دارجة. ملّي کاتستعمل هاد السّيت، راک موافق عليها.
آخر مرة تبدّلات: 15 أکتوبر 2026
1. السرڤيس د هاد السّيت
السّيت کايخلّيک تختار فيشيي ڤيديو ولّا أوديو من الجهاز ديالک، باش تصايب ليه سوتيتراج بطريقة أوطوماتيک بموديل ديال الفهامة د الهضرة، و تصحّحهوم، و تصدّرهوم. السرڤيس فابور، و بلا کونط.
2. السرڤيس کايخدم فالمتصفح ديالک
الفهامة د الهضرة کاتتنزّل من السيرڤر و کاتخدم فالمتصفح، على الجهاز ديالک. الفيشييات اللي کاتختار ما کايتصيفطوش لينا. يعني:
- خاصّک متصفح حديث فيه WebGPU و تيساع کافي فالجهاز باش تتنزّل الموديل ديال الفهامة د الهضرة.
- الزربة و الجودة ديال الکتابة کايتعلّقو بالموديل و بالجهاز ديالک.
- السطورا و النتائج کايتخبّاو فالمتصفح ديالک، و يقدرو يتمسحو إلا مسحتي المعطيات د المتصفح.
3. المحتوى ديالک
نتا المسؤول على الفيشييات اللي کاتستعمل فالسّيت و على السوتيتراج اللي کاتصدّر. خاصّک يکون عندک الحقوق اللازمة على هاد المحتوى. حيت الفيشييات ما کايوصلوناش، ما کانراقبوش و ما کانحتافظوش بحتى شي حاجة منهم.
4. الفهامة د الهضرة تقدر تغلط
الکتابة اللي کايعطيها الموديل ديال الفهامة د الهضرة هي نقطة بداية. يقدر يکون فيها أغلاط، کلمات ناقصة، ولّا توقيت ماشي دقيق. راجعها قبل ما تستعملها فشي حاجة مهمّة.
5. الحدود د المسؤولية
السّيت کايتقدّم «کيمّا هو»، بلا حتى ضمان صريح ولّا ضمني. معهد دارجة ما کايتحمّلش المسؤولية على أي ضرر مباشر ولّا غير مباشر ناتج على الاستعمال ديال السّيت، على التوقّف ديالو، ولّا على الأغلاط فالسوتيتراج.
6. الاستعمال المقبول
ما تستعملش السّيت باش تضرّ بيه ولّا تعرقل الخدمة ديال غيرک، و لّا باش تصاوب محتوى غير قانوني.
7. الملکية الفکرية
السّيت، الکود ديالو، الاسم و الشعار ديال معهد دارجة محفوظين.
8. التبديلات
نقدرو نبدّلو هاد الشروط مرّة مرّة. التاريخ اللّي فوق کايبيّن فوقاش آخر مرّة تبدّلو.
9. کيفاش تتواصل معانا
إلا کان عندک شي سؤال على هاد الشروط، صيفط لينا إيميل.